Clase de cine maxistral

 Porque cando é un mestre experto quen dá unha clase, chamámola maxistral.

Marcos Nine é un grande cineasta e é da Arousa, cousas en absoluto incompatibles. No IES Illa de Arousa sentímonos orgullosas diso, así que convidámolo a que ofrecese unha clase aos grupos de 3ESO sobre os elementos básicos da linguaxe cinematográfica. Organizou unha sesión moi interesante e déixanos deberes para xogar: 

1.  Gravar unha secuencia Lumiere.
2.  Realizar memes.
3.  Elaborar secuencias meme.
4.  Facer o noso rage comic.  

Clase de matemáticas: eixo de coordenadas, ángulos e cámaras.

Pasando do rage cómic a Bruce Lee e Chuck Norris.

Cremos que a actividade foi o bastante produtiva para que nazan novas e novos cineastas.

Begoña Caamaño "in memoriam"

A escritora Begoña Caamaño morreu este luns en Compostela. Fóisenos unha gran muller e unha magnífica escritora.
De profesión xornalista, Begoña Caamaño traballaba na Radio Galega desde 1989, primeiro na delegación de Vigo -a cidade na que naceu hai cincuenta anos- e despois na sede en Compostela, nas seccións de sociedade e cultura, nesta última participando en distintos programas, un deles, o Diario Cultural da súa amiga e tamén escritora Ana Romaní.
No ámbito literario, destacamos dúas obras das que disfrutamos especialmente: Morgana en Esmelle e Circe ou o pracer do azul. Esta foi comentada no noso club de lectura o ano pasado e todos coincidimos na súa extraordinaria calidade e na súa orixinalidade na revisión do mito de Ulises e Penélope.
Dóenos profundamente esta perda e,como non podía ser doutra maneira, acudimos ás súas propias palabras para despedila:

 "Pretendo coa miña obra ofrecer vimbios para facer un cesto novo, cun discurso contra o poder"

"Considero o feminismo como un humanismo global. Poñer as gafas lilas é poñerte na pel de quen padeceu a exclusión, non falar desde a historia narrada polos vitoriosos, senón de quen sufriu a exclusión por ser considerad@ menor e secundari@"

 "canto máis feliz sexan os demais, máis feliz serei eu"

Que a terra che sexa leve, que te acollan no seu seo Morganas e Penélopes!

Déixovos, tamén, esta carta de despedida da propia Begoña a Uxía:

http://www.sermosgaliza.gal/articulo/cultura/carta-despedida-begona-caamano/20141030072031031851.html

Constelacións Literarias

Estas son as propostas de lectura obrigatoria de Lingua Castelá para o curso 14-15:

1ºESO: De cadro en mito:

2ºESO: Sentirse raro

3ºESO: Calquera tempo pasado...:

Qualquer tempo passado from Susana Arins

4ºESO: Tristes guerras tristes:

Tristes guerras tristes from Susana Arins

Podedes escoller as vosas lecturas persoais na listaxe que corresponda.

Lecturas voluntarias de Lingua Castelá

Como xa comentamos nas clases, para avaliar as vosas lecturas voluntarias contaredes coas seguintes posibilidades, todas elas en formato audiovisual, para poder incorporar os vosos traballos a este blog:

1. Podedes realizar o booktrailer do libro que leades (ou o trailer da película que vexades). Lembrade que un booktrailer debe animarnos a ler, non espaventar lectoras/es...

Un exemplo mestre é este:

2. Podedes recrear unha escena audiovisualmente, aquela que consideredes máis impactante, máis representativa, máis chocante, máis misteriosa, máis... do libro:

D:Las lenguas del las mariposas from Cinetura on Vimeo.

3. Podedes, se non vos atrevedes a actuar, realizar unha presentación recensionando a obra:

Ljdh final from bairon30

Ou podedes tirar de creatividade, imaxinación e un chisco de desvergoña para realizar unha fotonovela:

Fotonovela from JoseValdez2013

4. Se non queredes actuar, podedes ficar na vídeo-reseña:

5. Y se isto aínda vos resulta complicado, gravade a vosa voz e contádenos a vosa opinión nun podcast: 

Los Juegos del Hambre, podcast.

Recordade: os traballos sobre lecturas voluntarias, dependendo da súa calidade, suman até 0'5 puntos, cada un, na cualificación final da materia.

De volta

Un curso máis, a biblioteca do IES Illa de Arousa bota a andar. Así comezamos:

• Apertura da biblioteca nos recreos, agás o venres,
• Información das actividades na xuntanza de pais e nais,
• Sesións de acollida para 1º ESO,
• Convocatoria dos clubs de lectura bibliarousa para o venres, 3 de outubro, no recreo.

Videopoemas para Rosalía (II)

Tal como programamos, na materia de Lingua e Literatura galegas, fomos recollendo os diferentes traballos audiovisuais sobre  a escolma poética A miña primeira Rosalía, de Xiana e Xosé Lastra e con ilustracións de María Manuela. O libro vén acompañado dun disco con poemas musicados por María Manuela, Mero, Mini e Xiana Lastra. O alumnado de 3º ESO elaborou diferentes versións , nunha escolla libre dos poemas e dos formatos: , ppt, movie maker... Déixovos unha  mostra, neste caso, elaborada por Nico e Iago:

Máis mostras, do curso 2015:

Despedida Bibliarousa+

 Este martes celebramos a derradeira sesión do club de lectura bibliarousa+ xa que, debido á escasa asistencia das últimas sesións, decidimos poñerlle fin a esta actividade.
Nestes tres anos xuntámonos cada mes para facer comentarios sobre diferentes libros ou películas.Gústanos ler, gústanos falar do que nos conmove e nos emociona, e gustoume (falo en primeira persoa) compartir esa viaxe literaria con todos vós. Nunca foi unha actividade maioritaria, sempre  tivo un seguimento  irregular, por iso foi sostido a base de entusiasmo e compromiso. E, claro, o entusiasmo foi esmorecendo e só quedaba o compromiso. E gústame manter os compromisos.
Pero non me gustan as despedidas. E por que non me gustan as despedidas?
Porque os abrazos quedan convocados para outra aperta, porque os bicos son de ida e volta, porque as palabras poden ser as derradeiras. Pero nesta sesión de despedida non houbo nada: nin abrazos, nin bicos, nin sequera unhas palabriñas. Nada, non houbo nada. E a nada non doe.
                                                                                                                 Fe Souto   
   
As miñas últimas recomendacións:

A memoria da choiva, de P. Feijoo

 La cena, de Herman Koch  

                                       


                                           
                 

Sementando pensamentos, colleitando poemas.

Sementamos pensamentos






colleitamos poemas

Esta foi a nosa particular celebración das  Letras Galegas: plantamos pequenos pensamentos acompañados de cadanseu poema escollido polos alumn@s de 3º ESO. Temos que agradecer a idea a Mª Xosé Lázare; a colaboración necesaria de Charo e Sonia  e, por suposto, aos rapaces e rapazas voluntarios que botaron unha man na plantación e presentación das "poeplantas".

Nunha sesión previa contamos coa presenza da famosísima poeta Susana S. Aríns, quen nos falou de como empezou a escribir, cales son os seus gustos literarios, cantos cartos se gañan escribindo poesía... en fin, unha sesión moi ben aproveitada na que @s alumn@s preguntaron todo o que sempre quixeron saber sobre a cración poética e non tiñan a quen preguntarlle... 

Para ela tamén houbo unha poeplanta.

LETRAS GALEGAS 2014

Un ano máis, programamos as nosas actividades para celebrar as nosas Letras. Como xa temos comentado, somos do parecer de que as Letras hai que coidalas día a día e non esperar á celebración do día de para que se nos encha a boca de loanzas e   fermosas palabras. Queremos lembrar o valor desta lingua coas palabras de Castelao en Sempre en Galiza:

“Que diríamos se o Estado mandase derrubar o Pórtico da Gloria? Pois eu digo que o noso idioma é unha obra de arte mil veces superior á obra do mestre Mateo. Creouna o xenio inviolable do noso pobo e labrouna o amor, a dor e a ledicia de moitísimas xeracións. Unha lingua é máis que unha obra de arte: é matriz inagotable de obras de arte”.

Neste ano 2014 celébrase a obra do poeta Díaz Castro. Para achegarnos a esta figura botamos man dun telexornal feito no CEIP Os Dices. Tamén, o documental. Moitas grazas, compañeir@s,  por este traballo impresionante  que xa se vén convertendo nun clásico arredor da figura homenaxeada nas Letra Galegas






Para acabar, a visión tan particular que fai Paco Nogueiras do poema Penélope:

Un paso adiante i outro atrás, Galiza,
i a tea dos teus sonos non se move.
A espranza nos teus ollos se esperguiza.
Aran os bois e chove.

Un bruar de navíos moi lonxanos
che estrolla o sono mól coma unha uva.
Pro tí envólveste en sabas de mil anos,
i en sonos volves a escoitar a chuva.

Traguerán os camiños algún día
a xente que levaron. Deus é o mesmo.
Suco vai, suco vén, Xesús María!,
e toda a cousa ha de pagar seu desmo.

Desorballando os prados coma sono,
o Tempo vai de Parga a Pastoriza.
Vaise enterrando, suco a suco, o Outono.
Un paso adiante i outro atrás, Galiza!



DÍAZ CASTRO, José María, Nimbos, Vigo, Editorial Galaxia, 1961

Inés y la alegría

Toulouse, verán de 1939. Carmen de Pedro, responsable en Francia dos dezmados comunistas españois, crúzase con Jesús Monzón, un cargo menor do partido que, sen ela intuílo, alberga un ambicioso plan. Uns anos despois, en 1944, Monzón, convertido na súa parella, organizou o grupo máis disciplinado da Resistencia contra a ocupación alemá, prepara a plataforma da Unión Nacional Española e conta cun exército de homes dispostos a invadir España...

Tal como falamos nas últimas sesións, comentaremos a obra Inés y la alegría, de Almudena Grandes. A sesión será o martes, 3 de xuño. É importante a vosa asistencia para tomar decisións arredor deste club de lectura.

Videopoemas para Rosalía (I)

Deixamos aquí unha mostra do que se vén chamando videocreación, é dicir, unha mestura de texto, imaxe e son que pode servir para ilustrar unha historia. 
Primeiro, un titorial para axudarnos a crear un videopoema:

Crear un video poema con Windows Movie Maker o Photopeach from Fernández Gorka

Comezamos co videopoema que fixeron @s alumn@s de 4º PDC, do poema de Celso Emilio Ferreiro "Eu en ti":



Xa máis elaborados, estes videopoemas de Rosalía feitos por alumnos de 3º ESO  do IES As Barxas. Podedes ver o seu interesatísimo blog EDUCORTO.





E, por último, este poema de Andrea Nunes Brións, "Todas as mulleres que fun". Gañadora do 1º premio de cinEOI da Coruña, 2012



Ánimo @s nos@s alumn@s de 3º ESO. Seguro que conseguen facer algo ben fermoso!!!


Máis referencias:
https://www.youtube.com/view_play_list?p=F8D921DC23F9D5FE

lendoamares

Inauguramos unha nova sección neste blog: Lendoamares. Trátase dun espazo lector aberto a todo o alumnado  no que iremos recomendando diferentes lecturas traballadas na aula. A primeira fase deste proxecto consiste en:

-Escollo un anaco dalgunhas lecturas que me gustasen
-Cópioo e déixoo nos comentarios, indicando o autor e título do fragmento, así como o nome de cada lector.

Os primeiros usuarios deste espazo serán @s alumn@s de 2º ESO. Comezamos pola materia de literatura galega, polo tanto, o seu código será: lendoamares2G. Para axudarvos nesta viaxe literaria, lémbrovos as diferentes lecturas que traballamos ao longo do curso:

• Castelos na area (Erros e Tánatos) de G. Navaza
• A marquesiña, Na cova dos carcamáns, de Castelao
• Cartas de inverno, de A. Fdez. Paz
• O cazador de trolls, de Luís Seixido
• A expedición do Pacífico, de M. Aleixandre
• Punto cero, de A. Fdez. Paz
• Un tesouro, de X. Neira Vilas
• Falar (Made in Galiza) de Séchu Sende
• O comezo das vacacións, de M. N. Singala
• Os lobos, de A. Fole
• Todos somos, de M. Calveiro
• Microficción 
• Micropoemas
• O encargo (Proxecto Bolboreta), de Andrea Maceiras
• Non te esquecerei (Boy, relatos de infancia), de Roald Dahl

Nunha segunda fase, incluiremos crítica literaria, biografías... xa iremos informando.

" A vida dos outros"

No club de lectura bibliarousa+ andamos ás voltas entre a literatura e o cine. Despois de ler "a noite branca", parecíanos moi interesante ilustrar a época posterior á 2ª guerra mundial, os tempos da guerra fría, con esta extraordinaria película. Recomendamos a crítica que fai a revista Zinema, unha das nosas páxinas de cine preferidas.

Sinopse:

O capitán Gerd Wiesler é un oficial extremadamente competente da Stasi, a todopoderosa policía secreta do réxime comunista da antiga República Democrática alemá. Pero, cando en 1984 lle encomendan que espíe á parella formada polo prestixioso escritor Georg Dreyman e a popular actriz Christa-Maria Sieland, non sabe ata que punto esa misión vai influír na súa propia vida.

Bretón, galés, élfico e outras linguas

Un ano máis, botamos man da nosa exposición "Xornais do mundo" á que tanto rendemento lle sacamos. Comezamos co curso de Cultura Clásica de 4º,no que traballamos conceptos previos na aula e, despois, por grupos, foron dispoñendo e organizando o material. O resto do alumnado foi pasando pola exposición ata chegar a 2º ESO, co que rematamos.

Como novidade, este ano engadimos exemplares de Islandia, Croacia, Escocia, A Bretaña (por fin conseguimos algo escrito en bretón!) e, como sorpresa,  unha mostra de alfabeto élfico, a lingua na que falan as personaxes de Tolkien na súa obra "O señor dos Aneis". Como facemos co resto dos países reais, este idioma tamén leva a súa ficha, neste caso un mapa da Terra Media. Observar como se pode "inventar" un idioma para facer máis realista a ficción é un dos aspectos que máis chama a atención dos rapaces.

Os xornais árabes, chineses, xaponeses... tamén son obxecto de moitos comentarios xa que sorprenden desde o momento en  que os abrimos e lemos en sentido inverso; o xaponés, de arriba cara a abaixo. Algunhas alumnas de 2º (Jennifer e Lidia M.) están procurando a tradución das noticias da portada en chinés e xaponés. Moitas grazas por enriquecer esta exposición!!! 

Pacificando

Un ano máis, celebrando un día de PAZ entre tantas frontes de batalla: recortes, novas leis de educación e do aborto... en fin, unha sociedade máis inxusta e menos libre.
Xa comentamos como afectou a esta biblioteca o recorte de profesorado. Por esta razón, as actividades que desenvolvemos non irían avante sen a colaboración e implicación de moit@s compañeir@s (titorías, orientación, dirección...)  que sempre están aí para botar un cabo.  Así as cousas, e botando man do traballo de anos anteriores, conseguimos programar actividades para falar de PAZ e dos  DEREITOS. Esta é a nosa proposta:

• "Pido a Paz e a palabra". Lecturas do club de lectura bibliarousa arredor deste tema. Entre moitas outras, velaquí unha mostra:

         ORIXE DO SÍMBOLO DA PAZ

 Deseñado polo artista británico Gerald Holtom en 1958 como emblema  dunha das meirandes marchas antinucleares da historia. En realidade,  é o logo de CND, Campaign for Nuclear Disarmament.

 O deseñador construíu o símbolo a partir das letras N (uclear) 

e D (isarmament) da linguaxe das bandeiras.

        Primeiro colleron aos comunistas, 
        e eu non dixen nada porque non era  
        comunista.

        Logo levaron aos xudeus, 
        e eu non dixen nada porque non era xudeu.

        Logo, viñeron buscar aos obreiros; 
        non dixen nada, porque non era obreiro nin 
        sindicalista.

        Máis tarde metéronse cos católicos, 
        e non dixen nada porque eu era protestante.

        Cando, finalmente, viñeron  por min, 
        xa non quedaba ninguén para protestar.

    Martin Niemüller (1892-1984) Pastor luterano.
     Foi un dos primeiros e máis tenaces críticos do
     nazismo.               

“Rapaces, coidado, loitamos moito  por conseguir o que tedes. Agora  tócavos a vós defendelo, mantelo e melloralo; non permitades que volo arrebaten”.

Prólogo de J. L. Sampedro en “Indignaos!”, de Stephane Hessel.  Este libro foi a orixe do movemento 15 M.

• Exposición "Un mundo inxusto".Programada para os rapaces de 1º ESO xa que o resto do alumnado xa a visitara o ano pasado.

• Película Cometas en el cielo. Programada para todo o centro con sesións de traballo. Paralelamente, un concurso de papaventos co lema "Voando en son de Paz".

.

A noite branca

Velaquí o próximo libro que escollemos no club de lectura bibliarousa+. Comentarémolo o martes, 18 de marzo.

2ª Edición - Premio Irmandade do Libro ao Mellor Libro Galego do ano 2012

Marcos sente a necesidade de coñecer e contar unha parte esquecida do seu pasado familiar cando descobre varias fotografías e un feixe de cartas escritas por un voluntario da División Azul, enviadasdesde a fronte rusa en 1941, e atopadas no interior dunha caixa de marmelo. Coa axuda da súa nai, o escritor inicia un proceso de investigación e de recuperación da memoria que o leva desde A Habana da emigración galega ata a fronte do río Volchov e o cerco de Leningrado, atravesando a Europa sacudida pola II Guerra Mundial. Catro voces van debullando un conxunto de historias entretecidas, que son protagonizadas por unha galería de personaxes entre os que destacan Alfredo, o autor das cartas; a súa nai María Luísa; os membros do pelotón do que el forma parte; cidadáns rusos atrapados pola crueldade da guerra; nenos, exiliados republicanos; xudeus e soldados alemáns que son testemuñas da viaxe da División cara á fronte do leste. Coa ribeira do Miño como centro e un mundo convulso como escenario, Fernández Naval constrúe en A noite branca unha narración emocionante, intensa, que lle permite recobrar personaxes e xeografías da súa primeira novela O bosque das antas (Premio Xerais 1988). A noite branca é unha novela de gran calado, de lectura seductora e decisiva na traxectoria literaria de Fernández Naval.

Podemos consultar tamén o interesante blog de Fdez Naval, onde se recolle a entrevista ao autor no programa Eirado da TVG:

http://fernandeznaval.blogaliza.org/category/a-noite-branca/