Felices lecturas

Como non podía ser doutra maneira, aquí (no apartado Novidades) vos deixamos un gorentoso menú de lecturas para este Nadal. Unha escolma de bos libros e películas para que gocedes de felices e saborosas lecturas.
Entre elas, o próximo libro que escollemos para o club de lectura de adultos, Demasiada felicidad, de Alice Munro. 

En llamas e sen Mandela

Xa comentamos que este curso a biblioteca está en servizos mínimos, debido á redución horaria que sufrimos. Con todo, non queremos deixar esmorecer un dos proxectos máis entusiastas desta biblioteca: os clubs de lectura. Acollemos a demanda de moitos rapaces que pedían comentar a película "En llamas", despois de ter lido a triloxía "Los juegos del hambre". Falamos das nosas escenas preferidas, do paralelo coa mitoloxía clásica (minotauro, panem et circenses...), da simboloxía do sinsajo... e de moitas cousas máis. Coma sempre, comendo algo de chocolate.

Aproveitamos esta entrada para facer unha pequena homenaxe a Nelson Mandela, a voz dos sen voz, que faleceu onte deixándonos un pouco orfos a todos. No proxecto Dereitos Humanos que traballamos o ano pasado, fixemos referencia á importancia da súa figura. 

Aquí vos deixamos, tamén, o poema Irmaus, musicado por Fuxan os ventos:

Tradución feminina de Homero

Pois así é. Así de feminina é esta versión que Begoña Caamaño fai de Circe e Penélope, as personaxes femininas que protagonizan Circe ou o pracer do azul. Moi lonxe das versións edulcoradas que nos mostran as diferentes interpretacións que se teñen feito a través da literatura ou do cine, esta obra ofrece a "outra lectura" que se pode facer das circunstancias e sentimentos que padecen as mulleres nun mundo de homes. Lémbranos aquel microrrelato de M. Denevi que comentamos no club de lectura:

Tradución feminina de Homero

Toda a Odisea, coas súas viaxes, os seus naufraxios, as súas sereas, as súas herbas máxicas, os seu animais míticos, os seus pazos misteriosos, as súas aventuras e desastres é, para Penélope, unha inútil e tediosa demora nos seus amores con Ulises. Mentres tanto Amdrómaca rosma: “Que o vello Homero conte a historia á súa maneira. Eu darei a miña versión. Eu, que a vivín. Eu, unha pobre muller infortunada. Primeiro, lembro, foi a prohibición de saír da cidade. Despois tiven que puír escudos, coser sandalias, fabricar frechas ata que as mans se me chagaron. Despois vendar feridas que sangraban e supuraban e enterrar os mortos. Despois escasearon os víveres e alimentabámonos de ratas e raíces. Despois perdín ao meu marido e aos meus fillos. Despois o exército invadiu a cidade e abusou de min e das miñas fillas. Por fin o vencedor fíxome a súa escrava”.       

                                                                                                                              Marco Denevi  

Despois    de comentarmos   este fermosísimo libro escollemos, como complemento, a película La Odisea. Comentarémola o martes, 10 de decembros ás 8.  Podedes vela completa en you tube: 




                                   

Réquiem por un soño

Os recortes de persoal que afectan a este centro durante o presente curso obrígannos a manter unicamente os servizos mínimos de atención á biblioteca. A redución de horas e de persoal terá as seguintes consecuencias:

•  rebaixar considerablemente a atención a usuarios durante os recreos,
•  xornadas de acollida só para 1º ESO,
•  O proxecto Aprendín reducirase á boa vontade de cada profesor, dado que non poderemos coordinalo como un Proxecto integrado,
• desaparición dos clubs de lectura bibliarousa e bibliarousa 1, deixando unicamente bibliarousa + (adultos) xa que se realiza fóra do horario escolar.

O equipo de biblioteca manterá, con esforzo, a coordinación do Proxecto Lector e as actividades de dinamización  programadas.

Como responsables da biblioteca deste centro queremos subliñar o noso malestar ao ver mermadas as posibilidades desta biblioteca que foi, durante estes anos, un verdadeiro  eixo dinamizador do centro.
Os espazos culturais creados durante estes anos foron un exemplo de ilusión e compromiso, arquivados agora no capítulo dos soños, non da realidade. Só nos queda, xa que logo, entoar este réquiem por un soño.

Recortes

Coma un mazazo, chegounos a noticia dos novos recortes de profesorado cando aínda estabamos saboreando o resultado do noso proxecto de biblioteca deste curso. Se se manteñen as previsións de recortes, non imos poder atender a biblioteca, con todo o que iso significa:

- catalogación e empréstito de libros,

- coordinación do Proxecto Lector,

- formación de usuarios,

- alfabetización informacional,

- dinamización de recursos,

- proxectos,

- clubs de lectura...

Tantos anos de traballo, tanta implicación do alumnado e do profesorado, tanta ilusión e tanta aprendizaxe...para NADA?????

 "E pois que cada tempo ten seu tempo,
iste é o tempo de (protestar)

A prensa recolle as nosas protestas:

http://www.lavozdegalicia.es/noticia/arousa/2013/07/13/recortes-comprometen-oferta-educativa-instituto-illa/0003_201307A13C4991.htm

http://www.diariodearousa.com/articulo/o-salnes/a-illa-el-ies-anuncia-movilizaciones-para-luchar-contra-el-enesimo-recorte-en-profesores/20130712234959033641.html

http://www.farodevigo.es/portada-arousa/2013/07/13/instituto-illa-pierde-3-profesores/844907.html

Un mar de Dereitos

Unha mostra audiovisual do que foi o noso festival dos Dereitos Humanos. Podedes ver canto aprendemos e que ben o pasamos! Temos que agradecerlle esta montaxe a Xabier, que conseguiu darlles vida a todas esas imaxes. Unha chiscadela, tamén,  para o equipo de biblioteca  (Begoña, Iolanda, Carmen e Fe) que coordinou todas estas actividades.



Dereitos humanos from Xabier Marques on Vimeo.

Recomendamos, ademais, o vídeo feito polo IES A Basella sobre os nenos soldado para o concurso de Amnistía Internacional. Parabéns aos nosos veciños por ese magnífico premio! Este vídeo," Pensé que era un juego",  foi visto polos nosos alumnos como parte das actividades realizadas o día do Festival dos Dereitos Humanos.























Ímoslle poñer un sorriso aos Dereitos Humanos. Cun estilo ben diferente, esta curta de Fesser sobre as torturas:

PROXECTO DEREITOS HUMANOS

Este venres celebramos no instituto o Festival dos Dereitos Humanos, a última actividade que forma parte do Proxecto traballado ao longo do curso. Durante esta semana fomos expoñendo os traballos que se realizaron nas distintas materias arredor desta temática. Parabéns a tod@s os profesor@s implicad@s polo magnífico traballo realizado e parabéns, tamén, a todo o alumnado pola súa participación. Aínda que non está recollido todo o material gráfico, velaquí unha mostra das actividades:

•  Dereitos Humanos e instrumentos de tortura. 2º ESO, realizado en Ciencias Sociais e Tecnoloxía.

• Dramatización de "Os Papalagui", representado por diferentes alumnos do instituto e coordinado por EDL e Teresa.

• Dereitos Humanos. "Minerais de sangue". Tecnoloxía 4º

• Dereitos Humanos no mundo, traballado no Ámbito Sociolingüístico PDC 4º 

• Arte e Dereitos Humanos. Plástica e Lingua Castelá

• A Liña do Tempo e os Dereitos Humanos. Ciencias Sociais de 4º ESO

• Xincana. 4º ESO

• Crebacabezas para todos

• Cubos Dereitos Humanos. Plástica e  CC SS

• Mardelinguas. Dereitos Lingüísticos. Lingua Galega 3º e 4º e Ámbito Sociolingüístico 3º.

• Obradoiro de camisetas co símbolo da PAZ

• Bailes cooperativos nos que participou todo o alumnado

• Lecturas "Pido a Paz e a Palabra". Club de lectura Bibliarousa

A Voz de Galicia recolle estas actividades. O título dá que pensar!!!

http://www.lavozdegalicia.es/noticia/arousa/2013/06/22/tipo-torturas-despedir-curso-illa/0003_201306A22C12992.htm

Para ver máis información sobre os Proxectos da biblioteca, consultade De Proxectos, o blog que creou Iolanda:

Bibliarousa na Voz de Galicia

A voz de Galicia presenta unha pequena reportaxe sobre os nosos clubs de lectura. Fai un  percorrido pola andaina dos nosos clubs ata chegar aos tres  que temos hoxe. Convén engadir a estas reflexións o grao de participación do profesorado que se implicou nesta iniciativa desde o primeiro día; a colaboración dos pais que levan connosco varios cursos e, naturalmente, o traballo de moitos  d@s alumn@s que  pasaron polo club e dos que nestes momentos están a participar.  Parabéns a todos eles e oxalá que cumpramos "mil primaveras máis".

http://www.lavozdegalicia.es/noticia/arousa/2013/06/15/club-primeros-lectores/0003_201306A15C119913.htm

Ler as pedras

Estivo con nós Manolo Gago, xornalista de profesión e arqueólogo de vocación. A súa exposición sobre "A Illa dos Mortos" foi toda unha lección sobre arqueoloxía, respecto ao patrimonio, entusiasmo, vocación didáctica... Creo que ese día conseguiu que naceran moit@s arqueólog@s!
 No club de lectura Bibliarousa + lemos o libro que comparte con X. Ayán,  Herdeiros pola forza e esta charla foi o complemento perfecto a esta lectura.


Esta obra é unha chamada á acción para recuperar o noso inmenso patrimonio cultural no horizonte do século XXI. Non deixedes de consultar o seu interesatísimo blog ((capítulo 0))  

Velaquí unha mostra do seu traballo sobre "A Illa dos mortos"

Sés na Arousa

Estivo con nós Sés, esta catautora galega que nos fixo gozar e, sobre todo, reflexionar e pensar sobre o noso mundo. Con Sés pasas da gargallada ao sorriso, é dicir, o que parece só un chiste, vólvese unha carga de profundidade. Non deixou títere con cabeza: o ensino, o sexo, o amor... Parabén, Sés, por esta actuación e grazas ás Equipas de Dinamización lingüística dos institutos de O Faro ds Lúas, A Basella e A Illa de Arousa por esta boa escolla.

Aquí vos deixamos unha montaxe que nos fixo Xabier Marqués, profe do instituto de Vilanova, sobre a actuación de Sés:

Sés 2 from Xabier Marques on Vimeo.

LETRAS GALEGAS 2013

Un ano máis, celebramos o Día das Letras Galegas. Neste caso, a homenaxe vai para R. Vidal Bolaño, un actor de teatro rebelde, crítico, irónico..., en definitiva, un autor necesario para a as nosas letras, que tan malparadas andan nestes últimos tempos de decretazo para a lingua e de  Leis de Mellora(?) de Calidade(?)Educativa.

- Biografía







Entre os múltiples materiais elaborados polos distintos centros educativos, seleccionamos o telexornal  realizado polo CPI OS Dices aos que,  un ano máis, agradecemos este magnífico traballo.
- Informativo realizado nos estudos do CPI Os Dices (Rois) que repasa a traxectoria do autor. 
Realización: Luís Aldegunde - CPI Os Dices (Rois)





Chéganos, tamén, esta fermosa brincadeira chea de ritmo e reivindicación:
-  Meu o mundo é !
Vídeo-karaoke para cantar e lembrar que hai outros 364 días onde as letras son protagonistas... e os números, as formas, as cores...En GALEGO todo podes facer, en GALEGO noso o mundo é!.
Autoría: Paco Nogueiras Nodar





E, por último, unha lembranza do noso paso pola manifestación do Día da Letras Galegas (iso si, con nariz e chapeu)

Mil primaveras por ler

Un ano máis, un día de celebración para eses nosos compañeiros de viaxe: os libros. Aínda que non son bos tempos para a lírica e, por veces, parece que imos cara a unha xeración  fast-book, de lectura rápida e superficial, nos libros agóchase todo un mundo por aprender e por gozar.
No instituto celebramos este día con actividades realizadas polo departamento de Orientación, a través das titorías coa lectura e comentario do poema de Paula Carballeira, que nos chega desde a rede de bibliotecas escolares:

Comentamos, tamén, algún dos seguintes vídeos que nos fan reflexionar  sobre  ese mundo:

Novas lecturas

Novas lecturas propostas para os clubs de lectura:

 -bibliarousa 1 (1º e 2º ESO) O misterio das badaladas, de X. P. Docampo

A historia vai de misterio. O reloxo do campanario da igrexa de Eiranova, cada medianoite, dá 13 badaladas no canto  de 12. Os protagonistas, cativos da vila, irán desembrullando o enigma ata descubrir por que soa a campá máis do debido e a quen lle interesa que iso ocorra.

- bibliarousa 2  (3º e 4º ESO) Traición, de Scott Westerfeld

Tally espera con impaciencia cumprir os 16 anos, porque a esa idade someterase a unha intervención cirúrxica que a converterá en perfecta. A súa transformación, con todo, vese ameazada cando a súa amiga Shay foxe para unirse á resistencia, un grupo de disidentes que non queren someterse á operación e que viven no Fume, unha cidade clandestina.

- bibliarousa + (adultos)  Herdeiros pola forza, de M. Gago e X. Ayán

Patrimonio cultural, poder e sociedade na Galicia do século XXI 

Como so carballos e castiñeiros, o libelo Herdeiros pola forza ten tres partes:cerna, sámago e cortiza. A cerna é unha retranqueira crítica historiográfica dos modelos de xestión do patrimonio cultural que se sucederon desde o século XIX. O sámago é unha denuncia expresa da situación actual, na que unha elite de burócratas, técnicos, académicos e intelectuais marxina as comunidades locais e a cidadanía en xeral na xestión de bens patrimoniais públicos. Finalmente a cortiza é unha alegación esperanzada a prol da participación activa da sociedade civil non só no goce do inmenso referente identitario que é o noso patrimonio cultural, senón tamén no proceso de construción social do coñecemento sobre o noso pasado. 

5º aniversario Bibliarousa

 Xa van cinco anos desde que botamos a andar o Club de lectura Bibliarousa. Desde aquela primeira lectura de Harry Potter ata as últimas, foron moitos os libros, películas, monográficos... e moit@s os alumnos e alumnas que pasaron por aquí! Medramos ano a ano ata chegar ao que temos hoxe:
 -Bibliarousa 1 (1º e 2º ESO)
 -Bibliarousa 2 (3º e 4º ESO)
 -Bibliarousa + (adultos)
Como non podía ser doutra maneira, festexamos este aniversario saboreando unha torta de queixo e facendo un repaso de todas as actividades que recollemos nesta presentación:

5 aniversario bibliarousa

View more presentations or Upload your own.

Queremos, tamén, mostrar algunha das actividades que estamos a facer no club de lectura de adultos. Temos a fortuna de contar entre os participantes con alumnas que pasaron por aquí hai anos e que "recuncaron" no club de lectura. Noelia, por exemplo, que está de lectora en Francia, agasallounos cunha sesión extraordinaria sobre a lectura Los niños de Elisabeth xa que visitou a maternidade de Elna e o museo do campo de refuxiados do sur de Francia, onde se ambientaba a novela. Moitas grazas, Noe.

Noe presentando "As voces baixas. Os nenos da retirada"

Recordatorio da visita

as voces baixas

View more presentations or Upload your own.

150 anos de Cantares

Ai das que levan na fronte unha estrela!
  Ai das que levan no bico un cantar!

 Así define Curros Enríquez a Rosalía de Castro, a escritora que queremos lembrar por cumprirse o 150 aniversario da publicación de Cantares gallegos.
Son moitos os traballos que nos chegan desde a rede de bibliotecas escolares para conmemorar este día. Velaquí unha escolma:

- desde a Asociación de Escritores de Lingua Galega, un percorrido pola personalidade poética da escritora

- desde o IES San Paio de Tui: Lingua nai, nai da Lingua

- desde o IES de Poio, esta constelación literaria arredor da obra de Rosalía.

- desde a biblioteca do  CEIP Alexandre Bóveda, Rabuñando Cantares

Para acabar, diferentes achegas musicais á obra de Rosalía: desde Amancio Prada a Guadi Galego pasando por Luz Casal, Rapoemas...

LENDO E LENDO

Novas propostas para os clubs de lectura:

- bibliarousa 1. Abdel, de Enrique Páez. Abdel é un rapaz  tuareg nómade que un día ve como cambia a súa vida: o seu pai,  Yasir,  decide emigrar a España procurando mellor vida; pero a viaxe vai estar chea de dificultades.  Una novela  que aborda o  tema da inmigración ilegal. Velaquí unha curta animada dos primeiros capítulos da novela, feito por Carlos Aldana, un rapaz guatemalteco que fixo a súa primeira curtametraxe cando tiña 16 anos.

-

 - bibliarousa 2. Donde los árboles cantan, de Laura Gallego.Viana, a única filla do duque de Rocagrís, está prometida ao novo Robian de Castelmar desde que ambos eran pequenos. Os dous ámanse e casarán na primavera. Con todo, durante a celebración do solsticio de inverno, alguén advirte ao rei de Nortia e os seus cabaleiros da ameaza dos bárbaros das estepas... e tanto Robian como o duque vense obrigados a marchar á guerra...

- bibliarousa +. As voces baixas, de Manuel Rivas."Todos e todas levamos dentro voces altas e baixas. A todos nos pode saír nalgún momento o ego napoleónico ou a voz do cacique. A cuestión é telas controladas: preocuparse cando nos saen esas voces altas".
"No tempo histórico que abrangue o libro, nese período de prohibicións e constante vixianza do ollo panóptico do poder, as mulleres vivían moito máis amarradas que os homes"

Paz e Dereitos Humanos

Durante esta semana fomos traballando no noso Proxecto Dereitos Humanos. Tal como programamos, estas foron as actividades realizadas:

-Visita á exposición "Un mundo inxusto". Cada curso foi visitando a exposición e realizando un cuestionario.

- Visionado da película "Los juegos del hambre", acompañada dunha unidade didáctica para traballar o tema da Paz e os Dereitos Humanos. Esta unidade foi aproveitada, tamén, para traballar as diferentes competencias, particularmente a  competencia lingüística e a social utilizando a dinámica de xogos cooperativos.